Greqi, Alket Rizai Me Granatë Në Dorë Merr Peng 6 Zyrtarë Të Burgut

I dënuari shqiptar Alket Rizai ka shpëtuar dy herë nga burgu i Koridhalos me helikopter së bashku me të dënuarin grek Vasilis Paleokostas. Arratisja e parë ndodhi më 4 qershor 2006 dhe Rizai u arrestua disa ditë më vonë, ndërsa arratisja e dytë ishte më 22 shkurt 2009. Ai u arrestua përsëri më 17 nëntor 2009 së bashku me partneren e tij, Soula Mitropia dhe që prej atëherë vuante dënimin në burgun e Malandrinos.

Alarm në burgun e Malandrinos në Greqi, ku i dënuari shqiptar Alket Rizai ka marrë peng 6 zyrtarë të burgut.

Thuhet se nga ora 9:00, Rizai mban në duar dy granata dore, duke kërcënuar për të hedhur në erë burgun me 200 gr eksploziv, në qoftë se nuk e lenë të lirë.

Situata është shumë e rrezikshme, pasi siç shkruajnë mediat greke, Alket Rizai është nën ndikimin e substancave narkotike. Gjithashtu në anën e tij është edhe një grup i të burgosurve shqiptarë, të cilët e mbështesin.
Sekretari i përgjithshëm i Ministrisë së Drejtësisë Skandamis Marios ka shkuar në burgun e Malandrinos, ndërsa krerët e ministrisë monitorojnë zhvillimet. Sipas Ministrisë nuk bëhet fjalë për eksploziv.

Ndërkohë mësohet se po zhvillohen negociatat për lirimin e pengjeve.

Tashmë në vendngjarje ndodhen forca të shumta të policisë si dhe zyrtarët e burgut që ishin jashtë detyrës.

Në korrik të vitit 2011, në një intervistë nga burgu i Grevenës, Alket Rizai njoftoi një arratisje të tretë, gjatë një interviste për Gazeta Shqiptare: “Grekët më kanë marrë mua vitet më të bukura të jetës sime, kështu që unë do të iki përsëri. Nuk do të ndalem, më mirë të më vrasin”.